கவிதை அல்ல.. ஆக்கிக்கொள்ளலாம்... - 20

சுடும் வெயிலை

சகித்துக்கொள்ளலாம் 

கொட்டும் மழையில் 

நனைந்தும் விடலாம்..

இந்த பாழாய்ப்போன 

தூரலைத்தான் 

என்ன செய்ய? தெரியவில்லை..

கவிதை அல்ல.. ஆக்கிக்கொள்ளலாம்... - 13

கீழே ஒரு நீள் செவ்வகம் விட்டு,

மேலிருக்கும் இரு 

முனைகளிலும் 

முக்கோணம் செய்து..

விடப்பட்ட செவ்வகத்தை இரு புறமும்

நூற்றெண்பது டிகிரி மடக்கி,

நீட்டி நிற்கும் தாளினை மீண்டும்  மடக்கி,

சதுரமாக்கி..

பாதியை மடக்கி,

மீதியை பின் மடக்கி,

மேலும் மடக்கி,

கீழும் மடக்கி,

விரித்து - ஒரு வழியாக 

கப்பலாகிப் போன

டைரியின் நடுப்பக்கத்தில்

என்ன எழுதப்பட்டிருக்கும்

இப்பெருமழை பெய்திருக்காவிடில்?

கவிதை அல்ல.. ஆக்கிக்கொள்ளலாம்... - 12

கருப்பு HB பென்சில்  கொடுத்து 

வானவில் வரையச்சொன்னேன்,

மழையை வரைந்துவிட்டு

"பினிஷ்ட்" என்றது குழந்தை..

"வானவில் எங்கே?" என்றேன்

 

"மழை நிற்கும் வரை இரு

வானவில் வரும்.." என்றாள்!